EC Ma Ndryshe ka dizajnuar 13 grupe indikatorësh/faktorësh, me një morri nën-indikatorësh, të cilat kanë rëndësi të veçantë në vlerësimin e transparencës së komunave. Në këtë kuadër janë përpiluar edhe pyetjet dhe janë dhënë shembuj se çfarë nënkuptojnë këto fusha, ashtu që fokusi i hulumtimit ka qenë në çështje të njëjta si dhe vlerësimet për secilën komunë janë bazuar në kritere të njëjta.
Indikatorët/faktorët të cilat janë monitoruar dhe mbi të cilat është shkruar raporti janë:
- Kryetari, Drejtorët dhe Anëtarët e Kuvendit
- Organizimi dhe funksionimi
- Puna e organeve politikë-bërëse dhe vendim-marrëse
- Luftimi i sjelljeve të pahijshme dhe keqpërdorimeve
- Integrimi Evropian
- Kontabiliteti dhe buxheti
- Kontratat e prokurimit publik, furnizimit dhe granteve
- Të punësuarit në administratën publike dhe organizatat/institucionet publike
- Pasuria kapitale dhe jokapitale
- Informimi dhe shërbimi i qytetarëve
- Bashkëpunimi me shoqërinë civile
- Planifikimi urban
- Monitorimi i projekteve urbanistike
Gjatë vitit 2016, EC Ma Ndryshe ka monitoruar transparencën në 7 komuna që njëherësh janë qendra rajonale, si Prishtina, Prizreni, Peja, Gjilani, Gjakova, Mitrovica dhe Ferizaj, si dhe në tetë komuna tjera si Rahoveci, Vushtrria, Malisheva, Suhareka, Klina, Dragashi, Shtërpca e Mamusha. Me këtë rast janë përcjellë zhvillimet në kuadër të pushtetit lokal, sikurse takimet e organeve vendimmarrëse, e po ashtu edhe diskutimet e ndryshme publike. Në të njëjtën kohë janë vëzhguar në mënyrë të rregullt publikimi i njoftimeve, raporteve, rregulloreve e dokumenteve tjera statutore në ueb faqen zyrtare të Komunës, por edhe portalet ndihmëse të krijuara nga vet komunat. Informatat relevante nga monitoruesit janë grumbulluar edhe përmes qasjes në dokumente publike, por edhe në kontakt dhe intervista të drejtpërdrejta me zyrtarët komunal dhe burimet tjera (siç janë përfaqësuesit e partive opozitare, aktivistët e shoqërisë civile dhe gazetarët lokal). Kësisoj këto të dhëna i kanë shërbyer autorëve të raporteve për përpilimin e draftit të parë.
Autorët e raporteve kanë përpiluar draft raportet bazuar në të gjeturat e monitorimit vjetor, por edhe referencat e institucioneve publike dhe organizatave tjera të shoqërisë civile. Ata kanë marrë për bazë aspektin normativ dhe veprimet në praktikë të zbatuara nga komunat për transparencën në indikatorë të ndryshëm. Gjithashtu janë analizuar përmbajtjet e raporteve të komunave dhe cilësia e të dhënave të pasqyruara në to. Janë marrë parasysh qasjet statike apo dinamike të zyrtarëve përgjegjës, sikurse edhe vështirësitë reale me të cilat ballafaqohen komunat, por janë vlerësuar edhe praktikat e mira që janë zbatuar nga pushtetet lokale për t’i tejkaluar sfidat reale, në përpjekje për të qenë transparent kundruall publikut.
Më pastaj draft raportet janë rishikuar nga një ekip i analistëve të EC Ma Ndryshe. Brenda afatit të caktuar kohor janë kërkuar edhe komentet përfundimtare nga vet Komuna, në lidhje me përmbajtjen e draft raportit.
Pas kompletimit të këtij cikli, autorët kanë finalizuar përmbajtjen e raporteve. Pas rishikimit nga ekipi i analistëve të EC Ma Ndryshe, raportet para publikimit janë edituar nga një redaktor.
